Yangiliklar
O‘zbekiston Energetika Haftaligi: mintaqaviy muloqot va biznes kuchlarni birlashtirmoqda
Tadbir tashkilotchilari: Iteca Exhibitions xalqaro ko‘rgazmalar kompaniyasi hamda ICA Eurasia Group va Congresses of Central Asia (CCA) hamkorligida, O‘zbekiston Respublikasi Oliy Majlisi Qonunchilik palatasi huzuridagi Tadbirkorlik, raqobatni rivojlantirish va sanoat masalalari qo‘mitasi, Energetika, Investitsiyalar, sanoat va savdo vazirliklari hamda “O‘zbekneftgaz” AJning rasmiy ko‘magida o‘tkazilmoqda.
Energetika haftaligi doirasida quyidagi strategik ahamiyatga ega ko‘rgazma va konferensiyalar o‘tkazilmoqda:
“Neft va gaz — OGU 2025” 27-xalqaro ko‘rgazma va konferensiyasi
“Energetika, energiya tejamkorligi va muqobil energiya manbalari — Power Uzbekistan 2025” 18-xalqaro ko‘rgazmasi
“Yashil energiya tejamkor texnologiyalar — GETCA 2025” maxsus bo‘limi
5-xalqaro energetika konferensiyasi
Tadbir neft-gaz qazib olish va elektr energetikasi sohalarini o‘z ichiga olgan ko‘p yo‘nalishli muhokamalarni birlashtiradi. Yetakchi xalqaro ekspertlar barqaror rivojlanish, ilg‘or texnologiyalar va xavfsiz energiyaning istiqbollari bo‘yicha fikr almashmoqda. Kun tartibida vazirliklararo muloqot, yalpi sessiyalar, panel va texnik sessiyalar mavjud. Ayniqsa, 2025-yil — ekologiya va “yashil iqtisodiyot” yili deb e’lon qilinganini inobatga olib, “yashil energiya” masalalari markazda turadi.
Birlashgan ekspozitsiyada 465 ta kompaniya va brend, 120 dan ortiq spiker, 1420 dan ortiq delegat ishtirok etmoqda. Ishtirokchilar geografiyasi 34 davlatni qamrab olgan — Avstriya, Ozarbayjon, Belarus, Buyuk Britaniya, Germaniya, Gruziya, Hindiston, Italiya, Qozog‘iston, Xitoy, Koreya Respublikasi, Qirg‘iziston, BAA, Polsha, Rossiya, Saudiya Arabistoni, Singapur, Slovakiya, AQSh, Turkiya va boshqalar.
Tadbirning asosiy voqeasi — 1997-yildan buyon o‘tkazib kelinayotgan “Neft va gaz O‘zbekiston — OGU” xalqaro konferensiyasi bo‘lib, aynan ushbu anjuman atrofida Energetika haftaligi shakllangan.
Ushbu hafta doirasida “O‘zbekneftgaz” AJ va Qozog‘istonning “QazMunayGaz” kompaniyasi o‘rtasida hamkorlik bo‘yicha “Yo‘l xaritasi” imzolandi. “O‘zbekneftgaz” AJ keng ko‘lamli modernizatsiya, texnologik rivojlanish va karbonat izi kamaytirish bo‘yicha loyihalarni amalga oshirmoqda.
Xitoyning China Datang Overseas Investment Co., Ltd. vakili Syao Dyen Yun ta’kidlashicha, hozirda Toshkent viloyatida quyosh elektr stansiyasi qurilishi boshlangan, Navoiy viloyatida esa shamol elektr stansiyasi loyihasi ishlab chiqilmoqda.
Shuningdek, Power Uzbekistan 2025 va GETCA 2025 ko‘rgazmalari doirasida ilg‘or energiya yechimlari, energiya samaradorligi va muqobil texnologiyalar namoyish etilmoqda.
Tadbirlar doirasida G2B va B2B uchrashuvlar, ikki tomonlama hujjatlarni imzolash marosimlari, “Youth Energy Section” dasturi doirasida yoshlar uchun tanlovlar, intellektual o‘yinlar va startap loyihalar ham o‘tkazilmoqda.
Hamma tadbirlar bir joyda o‘tkazilishi samarali muloqot, ekspert tajribasi, innovatsiyalar va investitsiyalar muhitini yaratmoqda.
Manba:
